Ek wil deur engtevrees-strate en ligte motreen
na jou woonplek ry,
Verby ou-bekende vervalle bakens van jongdae;
tussen bergies, spoor-oorgange en graffiti
jou huisie kry.
Ek wil oor jou hoë hekkie loer en roep,
jou bril oor die agterdeur sien blink,
En weer ervaar jou ouma-liefdegroet.
Waar jou radio fluister wil ek my langs jou tafel vlei,
daar waar geselskap veilig vloei, en niemand kwaad in hom het,
terwyl jou hande versigtig eenkant
die hemelste hambroodjie voorberei.
Ek wil teen voorstad-skemer jou tamatiekos proe,
jou kerrie, tee en boontjiesop.
Wyl jy op een been oor die agterdeur tuur
waar die spoorweg-duiwe teen die aandlig draai,
en jy ietsie mooi te sê het oor die babbi se aandlawaai.
Ek wil vir jou vrugte bring, vars brode en vis;
jou rondry in die Kaap – na Constantia, Houtbaai en Rondebosch se meent.
Vir jou ‘n snoek koop en jou laat lag;
terwyl die Kaapse winter teen die voorruit reënt.
Fred Roux Junie 2013
