By die kaartjie-toonbank van die WW1-museum in Ieper vra die man: “Ah – uit Zuid Afrika?“
“Ja” – sê ek.
Hy verduidelik by een van die tentoonstellings op die boonste verdieping werk daar vandag ‘n persoon van Suid-Arika.
“Oh” – sê ek.
“Ja” – sê hy. “Sy is van Calvinia.”
Calvinia!!!??
Ek storm op.
Kyk rond.
Gewaar ‘n dame wat elegant die besoekers help en wys… in natuurlike Vlaams… Duits… en Engels.
Kan dit sy wees?
Ek wag my beurt af… “Ek hoor hier is iemand van Cavinia?“
Sy swaai groot-oog om – begin uitbundig praat.. en hierdie keer val die Hantam-Afrikaans soos warm vla op die koue teëlvloere!
Ons omhels en lag en kwetter oor Brandvlei en skaap-tjops en die Hantam Hotel dat die Europeërs rondom neus-in-die-lug begin verbyhou.
Ontmoet vir Veronica.
Veronica Booysen.
Van Calvinia.
Na sowat 20 jaar in België (aanvanklik as au-pair, later getrou hier) is sy volledig ingeburger, woon in Poperinge, maar gaan nog terug na familie in SA wanneer sy kan.
Klein wêreld.
Sy stuur groete. Hoor jy?
